Duorme Totò ch’è ll’ora d’a cuntrora,
tu nun sì muorto, te sì appapagnato.
E t’è piaciuto sempe, si nun sbaglio,
chella mez’ora quann’ ‘o sole abbaglia.
‘O suonno d’ ‘a cuntrora è ‘o meglio suonno
pe’ chi s’addorme cu ‘a cuscienza apposto.
L’ he recitata bbona chesta parte!
Ma he chiuso ll’uocchie e t’ he tirata ‘a porta.
‘Sta porta è sulamente nu sipario,
che sparte ‘o munno bbuono e ‘o malamente,
e ‘a terra mò, pe’ tte, è nu palcoscenico
addò Nuie recitammo scene comiche.
Ma si arapive ll’uocchie chella sera
d’ ‘o diciassette Aprile ‘nmiez’o Carmeno
avisse ditto << Mamma e che spettaculo!>>
mmiscann’ ‘o chianto tuio c’ ‘o chianto ‘e Napule.
Napule, ‘o ssaie, nun è ‘na Malafemmena
che fa chiagnere ‘e llacreme cchiù amare,
ma è chella ca pe’ ddì << te voglio bene>>
t’ha salutato cu nu sbattimano.
Ogne sbattuta ‘e mano era ‘na lacrema
d’ammore overo ‘e cientomila core…
- E tu l’ he ntiso pure dint’ ‘o suonno
pecchè faie parte mò d’ ‘o meglio munno. –
Ccà invece ognuno è peggio ‘e San Tommaso,
crede ‘a nacosa sulo quann’ ‘a vede;
capisce ‘o bbuono ma fa ‘e ccose storte
e po’… se fa cuscienza ‘nannz ‘a morte.
Ma troppo tarde! Pure a Santa Chiara
Dopp’ arrubbato rinfurzaieno ‘e pporte!
Mo’ a tte te resta ‘o suonno che t’he fatto
nei panni del più grande Don Chisciotte.
Duorme Totò, cuntinualo stu suonno,
stu suonno tuio can un fernesce maie!
‘Na vota tanto fa’ cuntento ‘o core…
Durmenno può ffa chello ca te pare.
Forse, chisà, nun l’hanno fatto apposta.
Ma certamente ci ha perduto ll’ Arte
e ‘nzieme all’ Arte TU. Chell’allegria
pareva ‘a festa d’ ‘a malincunia.
Duorme Totò ch’è ll’ora d’a cuntrora,
tu nun sì muorto, te sì appapagnato
cu tutto ca stu sole non abbaglia,
però, stamme ‘a sentì, ca j’ nun me sbaglio:
si ‘a morte overamente è ‘na livella,
è ‘na livella sulo sotto terra,
ma dint’ ‘o core nò, dint’ a stu pietto
ognuno tene ‘o posto che lle spetta.
Perciò tu rieste chillo ca sì stato,
‘ncimm’ a ‘e penziere ‘e chi te vò cchiù bene…
Chi fra mill’anne spia: Totò chi è?...
Napule lle risponne: è Figlio a mme!